VOV4.Êđê - Leh truh ti Ăngle čiăng nao hlăm Klei bi kƀĭn tal 26 dŭm tĭng nao hlăm Klei kuôl kă mơ̆ng Êpul hgŭm lu ala čar kơ klei bi mlih yan adiê leh anăn nao čhưn mă bruă ti Ala Mtao Ăngle, Khua knŭk kna Phạm Minh Chính bi tuôm leh hŏng Khua knơ̆ng kiă kriê bruă knŭk kna Scotland Nicola Sturgeon. Khua knơ̆ng kiă kriê bruă knŭk kna Nicola Sturgeon bi êdah klei đaŏ knang Việt Nam srăng đru mguôp hlăm klei tŭ jing mbĭt mơ̆ng klei bi kƀĭn.

Khua Knơ̆ng kiă kriê bi mni klei đru mguôp mơ̆ng Việt Nam kơ klei gĭr ktưn mbĭt mdrơ̆ng hŏng klei bi mlih yan daiê, brei thâo Scotland ƀuăn rơ̆ng bi hrŏ êwa jhat ti hnơ̆ng 0 hlăm thŭn 2045 leh anăn hjăn ƀuôn prŏng Glasgơ, anôk srăng mkŏ mjing dŭm klei bi kƀĭn mơ̆ng COP 26, ƀuăn rơ̆ng bi hrŏ êwa jhat ti hnơ̆ng 0 hlăm thŭn 2030. Khua knŭk kna Phạm Minh Chính bi mni kơ klei găl mđĭ kyar klei bi hgŭm Việt Nam hŏng Scotland, krĭng bruă duh mkra đĭ kyar tal 2 mơ̆ng Ala Mtao Ăngle amâo djŏ knŏng mâo mnơ̆ng jăk hĭn jing kpiê Whisky hing ang hlăm tar rŏng lăn ôh ƀiădah lŏ mâo lu klei găl kơ klei mlih mrâo, bruă duh mkra mrô, ngăn prăk - hră ênua, mkra mjing êa pui, boh nik mđĭ kyar pui kmlă doh.

H Zawut pô mblang