VOV4.Êđê- Hruê 4/11, hluê mmông alŭ wăl, ăt hlăm hdră nao čhưn ti ala čar Prăng, Khua knŭk kna Phạm Minh Chính bi tuôm leh hŏng Khua mil čhil Prăng Emmanuel Macron. Ti anôk bi tuôm, dua khua kiă kriê mñă brei bi kjăp hĭn hdră bi hgŭm bruă duh mkra, mnia mblei lehanăn duh bi liê hlăm klei bi mjĕ Ƀĭng hgŭm phŭn kluôm dhuôm Việt Nam – Prăng, bi tŭ ư kơ dŭm hdră êlan lehanăn hdră msir hgŭm bruă hlăm wưng ti anăp kñăm mjing klei găl hlăm bruă mnia mblei plah wah dua ala čar, đru kơ anôk bruă duh mkra, mnơ̆ng dhơ̆ng dua ala čar mŭt hlăm wăl anôk blei mnia dua nah, tŭ ư mtrŭt mđĭ hdră bi hgŭm hlăm dŭm bruă phŭn msĕ si bruă êlan klông dŭ mdiăng, anôk bruă nah gŭm bruă lŏ hma, wăl hdĭp mda, bruă pui kmlă.

Dua tĭng tŭ ư srăng pŏk mlar lehanăn ba yua jăk Klei kuôl kă bruă mnia mblei êngiê Việt Nam - EU (EVFTA) mbĭt anăn mtrŭt mđĭ bruă bi mklă Klei kuôl kă răng mgang duh bi liê Việt Nam - EU (EVIPA), mjing boh kdrŭt kơ hdră bi hgŭm bruă duh mkra, mnia mblei lehanăn duh bi liê plah wah Việt Nam hŏng Prăng lehanăn EU./.

                                                    Pô mblang: H’Nêč Êñuôl