VOV4.Êđê - Hlăm hdră Klei bi kƀĭn COP 26, Khua knŭk kna Phạm Minh Chính bi tuôm leh hŏng Khua mil čhil Mi Joe Biden, Khua mil čhil Hàn Quốc Moon Jae In, Khua knŭk kna Thái Lan Prayud Chan-o-cha, bi tuôm hŏng Khua knơ̆ng kiă kriê Keh Wăl hdĭp mda tar rŏng lăn.

Ti anôk bi tuôm hŏng Khua mil čhil Mi Joe Biden, Khua knŭk kna Phạm Minh Chính bi mni bruă Khua mil čhil Biden mđĭ klei bi hgŭm hŏng Việt Nam lehanăn dŭm ala čar krĭng Ơrôp, mñă klă ala čar Việt Nam bi myuôm klei bi mjĕ hŏng Mi lehanăn čang hmăng srăng dưi mđĭ hĭn klei bi mjĕ anei ƀrư̆ hruê ƀrư̆ tŭ dưn lehanăn h’ĭt kjăp. Khua mil čhil Biden bi mni kơ klei nao hgŭm pral kdal lehanăn klei ƀuăn rơ̆ng kjăp phĭt mơ̆ng Việt Nam ti Klei bi kƀĭn COP 26. Dua khua kiă kriê tŭ ư srăng mtrŭt mđĭ Klei bi hgŭm kluôm dhuôm Việt Nam – Mi đĭ kyar jăk siam, hlăm anăn mâo klei bi hgŭm hlăm bruă ngăn prăk, kdrăp mrô kñăm msir mghaih klei bi mlih yan adiê, boh nik jing bruă hluê ngă djăp ênŭm klei bhiăn hluê si Klei kuôl kă Paris, bi mni klei hgŭm mơ̆ng anôk bruă Mi hlăm hdră mđĭ kyar mtah, đĭ kyar h’ĭt kjăp ti Việt Nam./.

H Nêč pô mblang