VOV4.Êđê - Hruê mbruê, ti sang bruă knŭk kna, khua knŭk kna Phạm Minh Chính mâo leh klei blŭ hrăm êlan đĭng blŭ hŏng pô bi ala mơ̆ng khua mil čhil Mi kơ yan adiê John Kerry. Dua tĭng bi tŭ ư kơ klei mjĕ giăm Việt Nam - Mi leh êgao 25 thŭn lŏ mâo klei đĭ kyar jăk hĭn, hlăm anăn mâo wăt bruă duh mkra - mnia mblei, klei bi mguôp mđĭ kyar kjăp jing mta kñăm leh anăn klei bi mguôp pui mklă doh jing êlan mngač, boh kdrŭt mrâo. Ƀri wưng anei, bi ala kơ knŭk kna leh anăn mnuih ƀuôn sang Việt Nam, khua knŭk kna Phạm Minh Chính mâo leh klei lač jăk kơ knŭk kna leh anăn mnuih ƀuôn sang Mi kyua mkăp brei leh vaccine hŏng kdrăp yua bruă mdrao mgŭn kơ Việt Nam čiăng gang mkhư̆ klei ruă tưp Covid-19. Khua knŭk kna Phạm Minh Chính yap yuôm bhăn klei gĭr mơ̆ng knŭk kna khua mil čhil Mi Joe Biden mtrŭt mđĭ leh dŭm klei gĭr mbĭt kñăm bi mdrơ̆ng hŏng klei mlih yan adiê. Anei jing boh klei hlăm tar rŏng lăn kyuanăn srăng nao truh kơ tar rŏng lăn. Khua knŭk kna Phạm Minh Chính mñă klă, khă hdră bi mlih bruă duh mkra mtah dôk mâo lu klei dleh dlan, ƀiădah Việt Nam mâo dŭm klei ƀuăn rơ̆ng hlăm bruă bi mdrơ̆ng hŏng klei mlih yan adiê.

Y Ƀel pô mblang