VOV4.Êđê - Tlam mbrue (1/11), ti ala čar Angle, Khua knŭk kna Phạm Minh Chính nao lehanăn mâo leh klei bi blŭ hrăm yuôm bhăn hlăm hrue tal êlâo ti anôk bi kƀĭn Gưl dlông klei bi mlih yan adiê mâo mkŏ mjing hlăm hdră bi kƀĭn tal 26 dŭm tĭng bi mguôp hlăm jar mơ̆ng Êpul hgŭm lu ala čar kơ klei bi mlih yan adiê COP 26. Khua knŭk kna mñă klei mdrơ̆ng hŏng yan adiê bi mlih, lŏ kơrŭ wĭt msĕ si aguah tlam mjing mta kñăm tal êlâo kơ hdră êlan mđĭ kyar, jing ênoh čuăn kơ knhuah dôk dơ̆ng ƀơ̆ng huă mơ̆ng djăp gưl, jih jang dhar bruă, phung duh mkra lehanăn phung ƀuôn sang. Khua knŭk kna lač, jih jang bruă bi mă bruă hŏng klei msĕ si aguah tlam, lehanăn mjing phung ƀuôn sang jing knơ̆ng, amâo mâo lui sa čô kơ tluôn ôh.

Bi ruĕ klei blŭ hrăm, Khua knŭk kna lač, Việt Nam hlăk gĭr jih ai tiê čiăng dưi mdrơ̆ng hŏng klei bi mlih yan adiê êjai, lehanăn mđĭ kyar bruă duh mkra êjai, rơ̆ng kjăp hĭn kơ klei hdĭp mda phung ƀuôn sang. Việt Nam čang hmăng mđĭ hĭn klei bi hgŭm hŏng ala tač êngao hlăm dŭm bruă duh bi liê lehanăn mđĭ kyar kjăp hlăm wưng kơ anăp./.

Y Khem pô mblang