VOV4.Êđê - Aguah 9/11, ti Anôk bruă knŭk kna, Khua knŭk kna Phạm Minh Chính drông leh Khua phŭn bruă hŏng tač êngao Australia Marise Payne ƀri gưl hriê čhưn ti Việt Nam. Khua Knŭk kna Phạm Minh Chính hơêč hmưi kơ dŭm klei tŭ dưn knŭk kna leh anăn mnuih ƀuôn sang Australia mâo leh hlăm bruă gang mkhư̆ klei ruă tưp Covid-19 leh anăn krŭ wĭt, mđĭ kyar bruă duh mkra hlăm wưng êgao, bi mni lač jăk kơ Australia ƀuăn rơ̆ng đru 5 êklăk 2 êtuh êbâo aruăt vaccin kơ Việt Nam leh anăn čang hmăng Australia lŏ dơ̆ng hrăm mbĭt hŏng Việt Nam hlăm bruă gang mkhư̆ klei ruă tưp leh anăn krŭ wĭt, mđĭ kyar bruă duh mkra ala ƀuôn… Khua knŭk kna bi mni klei tŭ Klei bi kƀĭn Khua phŭn bruă hŏng tač êngao tal 3 plah wah dua ala čar, lač anei jing klei bi mklă kơ klei gĭr jih ai tiê dua nah mđĭ klei bi hgŭm bruă. Khua knŭk kan Phạm Minh Chính mtă kơ Australia lŏ dơ̆ng mđĭ lar đru mđĭ kyar klă sĭt kơ Việt Nam leh anăn ksiêm dlăng lŏ pŏk ƀăng anôk ba čhĭ dŭm mta mnơ̆ng dhơ̆ng lŏ hma - kan hdang mơ̆ng Việt Nam ăt msĕ mơh ksiêm dlăng pŏk ngă hdră hră mơar ngă bruă kơ mnuih mă bruă Việt Nam, mtrŭt mjhar anôk bruă mnia blei dua ala čar duh bi liê mnia blei.

H Zawut pô mblang