VOV4.Êđê -  Ƀri Klei bi kƀĭn online gưl dlông Ngŏ Asi (EAS) tal 16, tlam hruê 27/10, Khua knŭk kna Phạm Minh Chinh mâo leh klei bi tuôm hŏng phung Khua bi ala dŭm ala čar hlăm EAS ti Hà Nội, êlâo kơ nao hlăm Klei bi kƀĭn mơ̆ng anôk mkŏ online ti Hà Nội. Khua knŭk kna Phạm Minh Chính bi mklă Việt Nam hơĭt kjăp hdră êlan hŏng tač êngao êngiê, lu jơr, lu tĭng klei bi hgŭm hŏng tač êngao, pral, nŭ kma hŏng tač êngao kluôm ênŭm, êlam, jing ƀĭng hgŭm đaŏ knang leh anăn jing ala čar mâo bruă klam hlăm êpul êya dlông rŏng lăn. Hlăm ai tiê anăn, Việt Nam dlăng myuôm klei bi hgŭm jăk siam hŏng dŭm ala čar, hrăm mbĭt răng mgang wăl hdĭp mda êđăp ênang, hơĭt kjăp čiăng mđĭ kyar, mđĭ klei bi hgŭm lu tĭng, bi hgŭm leh anăn ñŭ kma hŏng tač êngao kyua sa dlông rŏng lăn mtah, doh, đĭ kyar hơĭt kjăp, kluôm ênŭm leh anăn jăk hĭn. 

H Zawut pô mblang