VOV4.Êđê- Aguah hruê 23/9, Khua knŭk kna Phạm Minh Chính gĭt gai leh Klei bi kƀĭn Anôk bruă gĭt gai kñăm ksiêm dlăng hdră gang mkhư̆ klei ruă tưp hlăm wưng êgao, boh nik bi trông kơ hdră msir “Mdrơ̆ng êđăp ênang, pral kdal, djŏ guôp, dưi ksiêm dlăng klei ruă Covid 19” hlăm wưng ti anăp. Blŭ hrăm ti anôk bi kƀĭn, Khua knŭk kna mtă, brei tui duah hdră mdrơ̆ng djŏ guôp, êđăp ênang, pral lehanăn tŭ dưn. Bruă đru mguôp klei blŭ jing hdră yuôm bhăn amâo dưi bi kdung ôh kyua drei mâo ƀiă hruê mmông, klei akâo čiăng lu, bruă ngă lu mơh, klei thâo drei mâo hnơ̆ng. Khua knŭk kna lač klă, hlăm wưng êgao, ti dŭm alŭ wăl, hlăm mlam m’ak mlan pŭr yan hla luh, mnuih ƀuôn sang kbiă ti êlan dơ̆ng lu, huĭ srăng tưp klei ruă. Brei mă klei hriăm kơ boh klei anei. Hluê si klei hưn mơ̆ng Anôk gĭt gai hdră mdrơ̆ng klei ruă Covid 19, klei ruă tưp hlăm kluôm ala ăt dưi ksiêm dlăng lehanăn mâo lu klei bi mlih jăk, hlăm 2 hruê kăm giăm anei, ênoh mnuih ruă hlăm êpul êya lehanăn djiê hrŏ. Ară anei, hnơ̆ng vaccine mâo kah mbha êbeh 50,2 êklăk hnơ̆ng lehanăn dưi tlŏ leh êbeh 35,1 êklăk aruăt./.

                                                    Pô mblang: H’Nêč Êñuôl