VOV4.Êđê- Tlam mbruê, khua knŭk kna Phạm Minh Chính gĭt leh leh klei kƀĭn brei boh blŭ kơ bruă kơrŭ wĭt, mđĭ kyar bruă duh mkra ala ƀuôn. Khua knŭk kna mñă hdră anei čiăng mâo ênŭm klei prŏng, hruê mmông, nao mbĭt hŏng hdră mtrŭn hlăm klei kƀĭn prŏng tal 13 mơ̆ng Đảng, hdră êlan mđĭ kyar bruă duh mkra ala ƀuôn 5 thŭn wưng thŭn 2021-2025 leh anăn hdră êlan mđĭ kyar bruă duh mkra ala ƀuôn thŭn 2022. Khua knŭk kna mtă mâo ai tiê čŏng ksiêm dlăng, đăo knăl mâo klei djŏ, ênuah ênô, klă mngač hluê hŏng klei čih pioh mâo klei đăo knang. Hdră anei čiăng kñăm kơ dŭm boh klei hŏng êlan: Dŭm bruă klam hdră bruă mdrao mgŭn, boh nik jing mđĭ klei thâo hlăm bruă mdrao mgŭn, kdlưn hĭn jing mđing kơ bruă mdrao mgŭn mkăp, bruă mdrao mgŭn nah gŭ, lehanăn vaccine. Dŭm boh klei hlăm klei hdĭp yang ƀuôn, hdră đru kơ dŭm knơ̆ng bruă, êpul bi mguôp, rơ̆ng mâo klei hơĭt dŭm hdră êlan prŏng, ksiêm dlăng klei prăk luič ênoh… Khua knŭk kna mtă kơ dŭm anôk bruă gĭt gai hmư̆ klei blŭ mơ̆ng phung bi ala leh anăn lŏ ksiêm dlăng klei blŭ mơ̆ng dŭm anôk bruă djŏ tuôm hŏng hdră kơrŭ wĭt, mđĭ kyar bruă duh mkra ala ƀuôn, mjêč hưn mdah hŏng dŭm gưl bruă mâo klei dưi, boh nik srăng rơ̆ng boh tŭ dưn leh anăn bi mâo klei sa ai.

Pô mblang Y-Khem Niê