VOV4.Êđê - Aguah mbruê, khua knŭk kna Phạm Minh Chính gĭt gai leh klei kƀĭn trông online ala čar mơ̆ng knŭk kna hŏng dŭm phŭn, dhar bruă, anôk bruă gưl dlông leh anăn dŭm alŭ wăl kơ bruă mtrŭt mđĭ prăk brei čan duh bi liê bruă mbĭt. Tui si klei hưn mdah, hdră êlan duh bi liê ênoh prăk NSNN thŭn 2021 mâo klei klei jao mơ̆ng khua knŭk kna kơ dŭm phŭn, dhar bruă, anôk bruă gưl dlông leh anăn dŭm alŭ wăl mơ̆ng knhal jih thŭn 2020 hŏng ênoh prăk jing 461.300 êklai prăk.

Truh kơ ară anei, dưi ba mbha, jao kơ dŭm hdră mkăp giăm 88%. Blŭ hlăm tinăn, khua knŭk kna brei thâo: klei kƀĭn trông anei kñăm čih yao boh tŭ dưn, hlăk mblăng dŭm bruă dưi ngă leh anăn ka dưi ngă, kơ phŭn agha, boh nik jing mơ̆ng pô. Mơ̆ng anăn dưi mâo bruă kñăm, hdră êlan mđĭ bruă brei čan duh bi liê kơ bruă mbĭt hlăm hruê mmông kơ anăp. Khua knŭk kna mtă kơ phung bi ala kñăm jih klei mĭn, bi trông čiăng mđĭ klei brei čan, yua mâo boh tŭ dưn ênoh prăk duh bi liê kơ bruă mbĭt, đru mđĭ kyar bruă duh mkra - ala ƀuôn thŭn 2021 leh anăn jing tur knơ̆ng mđĭ kyar bruă duh mkra - ala ƀuôn thŭn 2022.

Y Khem pô mblang