VOV4.Êđê - Ăt ƀri gưl nao hlăm Klei bi kƀĭn COP26, ti Ăngle, Khua knŭk kna Phạm Minh Chính mâo leh mmông mă bruă hŏng khua gĭt gai Êpul grup AstraZeneca leh anăn dlăng klei bi klă hră mơar leh anăn hưn mdah dŭm klei kuôl kă bi hgŭm plah wah AstraZeneca hŏng Việt Nam. AstraZeneca srăng duh bi liê 2 êbâo êklai prăk ( 90 êklăk USD) kñăm đru Việt nam mđĭ hnơ̆ng mkra mjing êa drao hlăm ala čar, đru kơ mnuih ruă dưi mâo êa drao jăk hĭn dưi mkra mjing ti Việt Nam, Khua Knŭk kna Phạm Minh Chính bi mni kơ Astra Zeneca hmao mkăp vaccin kơ Việt Nam hlăm wưng êgao, kyua anăn đru mguôp yuôm bhăn hlăm bruă ktuê dlăng klei ruă Covid-19, đru hlăm bruă răng mgang, kriê dlăng klei suaih pral kơ mnuih ƀuôn sang.

Khua knŭk kna čang hmăng AstraZeneca hnưm ba jao ênoh vaccin adôk ƀuăn brei kơ Việt Nam djŏ hnơ̆ng, bi mklă Việt Nam čang hmăng bi hgŭm hŏng AstraZeneca sui, rơ̆ng djăp kơ bruă mdrao mgŭn hlăm klei dlông rŏng lăn rŭng răng kyua klei bi mlih yan adiê leh anăn klei ruă tưp.

H Zawut pô mblang