VOV4.Êđê- Ƀri hruê phung mă bruă duh mkra Việt Nam (13/10), Khua knŭk kna Phạm Minh Chính mrâo m’ĭt hră kơ êpul mă bruă duh mkra hlăm kluôm ala čar. Hlăm hră m’ĭt, Khua knŭk kna bi êdah klei thâo săng klă, mđing hmư̆ lehanăn ƀuăn srăng mâo dŭm hdră msir đru kơ phung mă bruă duh mkra hgao klei dleh dlan, gĭr ktưn hĭn lehanăn Hưn mdah knŭk kna dôk čih mkra hdră lŏ krŭ wĭt, mđĭ kyar bruă duh mkra – ala ƀuôn hŏng klei êđăp ênang, pral kdal, ksiêm dlăng tŭ dưn klei ruă Covid 19. Mbĭt anăn, pŏk ngă dŭm hdră msir bruă mdrao mgŭn hŏng klei kreh knhâo, êđăp ênang, djŏ guôp, tŭ dưn, boh nik Hdră êlan vaccine, đru kơ anôk bruă duh mkra, phung mă bruă duh mkra pral lŏ krŭ wĭt bruă duh mkra pla mjing, mnia mblei, ba wĭt klei hdĭp msĕ êlâo. Knŭk kna lehanăn dŭm anôk bruă djŏ tuôm srăng mtrŭt mđĭ bruă mkra mlih klei bhiăn, ruh mtlaih klei dleh dlan, gun kpăk, iêu mtrŭt djăp ai dưi, klei mâo, mkra mlih bruă ngă hră m’ar... mjing wăl anôk mnia mblei jăk găl, êđăp ênang, mtăp mđơr čiăng kơ anôk bruă duh mkra đĭ kyar lehanăn ñŭ kma hŏng tar rŏng lăn. Ƀri gưl anei, Knŭk kna lehanăn mnuih ƀuôn sang Việt Nam ăt čih yap klei đru, sa ai, hrăm mbĭt mơ̆ng dŭm anôk bruă duh mkra, phung mă bruă duh mkra ala tač êngao mâo leh klei đru mguôp kơ hdră mđĭ kyar bruă duh mkra Việt Nam ăt msĕ mơh hdră gang mkhư̆ klei ruă tưp./.

Pô mblang: H’Nêč Êñuôl