VOV4.Êđê - Tlam 3/11, Knăm drông klă sĭt Khua knŭk kna Phạm Minh Chính hŏng êpul bi ala gưl dlông Việt Nam nao čhưn klă sĭt ala čar Prăng mkŏ mjing leh ti Sang Invalides ti ƀuôn prŏng phŭn Paris. Leh knăm drông klă sĭt, Khua knŭk kna Phạm Minh Chính bi tuôm leh hŏng Khua Thượng viện Prăng Gérard Larcher. Khua Thượng Viện Prăng bi êdah klei mpŭ kơ bruă Việt Nam tŭ jing hlăm bruă mkra mđĭ bruă duh mkra, mđĭ lar hnơ̆ng đĭ kyar pral, ƀiădah mbĭt anăn ăt dưi kriê pioh knhuah dhar kreh pô.

Khua knŭk kna Phạm Minh Chính bi mni kơ dŭm klei đru mguôp yuôm bhăn mơ̆ng anôk bruă kƀĭn ala dua ala čar hlăm bruă mkra mđĭ klei bi hgŭm lu mta Việt Nam –  Prăng. Dua tĭng ăt bi trông kơ dŭm boh klei ti krĭng wăl leh anăn lu ala čar mđing, hlăm anăn mâo bruă êa ksĭ Ngŏ leh anăn mñă klă dŭm ala čar brei đru mguôp hlăm bruă mđĭ lar klei êđăp ênang, hơĭt kjăp leh anăn mdrŏng sah. Leh anăn mtam, Khua knŭk kna Phạm Minh Chính leh anăn Khua knŭk kna Prăng Jean Castex dlăng knăm bi siñê dŭm klei kuôl kă bi hgŭm plah wah dŭm anôk bruă leh anăn anôk bruă duh mkra dua ala čar.

H Zawut pô mblang