VOV4.Êđê- Lŏ dơ̆ng hlăm hdră nao čhưn ala čar Prăng, hrue mbrue (5/11), Khua knŭk kna Phạm Minh Chính lehanăn Êpul bi ala khua prŏng Việt Nam nao čuă lehanăn mă leh bruă hŏng Anôk bruă ksiêm hriăm Pasteur Paris. Phung khua kiă kriê Anôk bruă Pasteur Paris brei thâo hlăm ênoh ala čar mâo klei hgŭm hŏng Anôk bruă anei, Viêtj nam mâo bruă klam yuôm bhăn. Blŭ hrăm ti anôk mă bruă, Khua knŭk kna mñă, anei jing anôk êpul khua êmua Việt Nam ƀuh čiăng dưi truh hlăm gưl hiu ngă bruă tal anei, lŏ dơ̆ng bi kjăp klei bi mguôp hŏng dŭm Anôk bruă ksiêm hriăm Pasteur. Jih jang djăp anôk Pasteur jing sa kdrêč hlăm klei bi mguôp plah wah Việt Nam hŏng Prăng.

Tar rŏng lăn, ƀiă snăk mâo ala čar mâo truh kơ 3 bĭt Pasteur msĕ hŏng Việt Nam, mâo dăp leh hlăm jih 3 kwar Dưr; Krah; Dhŭng anei jing hdră êlan mơ̆ng phung nao êlâo ngă leh hŏng klei jăk. Ăt hlăm hrue mbrue, Khua knŭk kna Phạm Minh Chính nao čuă leh Anôk ngă bruă mơ̆ng êpul mjuăt bi hriăm, bruă kreh knhâo lehanăn dhar kreh Êpul hgŭm lu ala čar UNESCO ti Paris, ala čar Prăng lehanăn mâo klei blŭ hrăm hŏng aduôn Audrey Azoulay, Khua knơ̆ng kiă kriê UNESCO. Tlam mmăt mbrue, khua knŭk kna Phạm Minh Chính kbiă leh mơ̆ng Paris, mjưh ruĕ jăk siam jih jang hdră nao čhưn kơ ala čar Prăng./.

Pô mblang: Y-Khem Niê