VOV4.Êđê - Tŭ ư klei iêo jăk mơ̆ng khua knŭk kna Campuchia Hun Sen, hruê mbruê, khua knŭk kna Phạm Minh Chính nao hgŭm lehanăn mâo klei blŭ yuôm bhăn hlăm klei bi kƀĭn gưl dlông bi mguôp dŭm alŭ wăl krĭng Mê Kông pŏk phai (GMS) tal 7 dưi mkŏ mjinh hŏng êlan online. Nao hgŭm hlăm klei bi trông mâo khua knŭk kna dŭm ala čar Campuchia, Lào, Thailand, Trung Quốc, Việt Nam, pô bi ala mơ̆ng Myanmar, khua kiă kriê knơ̆ng bruă ngăn prăk Asi (ADB) lehanăn giăm 350 čô phung bi ala mơ̆ng dŭm phŭn, dhar bruă 6 ala čar, ala čar ƀĭng hgŭm lehanăn êpul dŭm knơ̆ng bruă hlăm alŭ wăl lehanăn êngao alŭ wăl. Hŏng akŏ “Bi kjăp klei ktang bi tuôm klă anăp hŏng dŭm klei lông dlăng mơ̆ng wưng 10 thŭn mrâo.” Klei bi kƀĭn  gưl dlông anei dưi ksiêm dlăng leh klei bi mguôp mơ̆ng klei bi trông tal 6 hlăm mlan 3 thŭn 2018 lehanăn bi trông kơ hdră êlan bi mguôp hlăm wưng 10 thŭn mrâo ăt msĕ si dŭm hdră êlan čiăng dưi găn jih dŭm klei dleh dlan ară anei. Bi kơ hdră bi mguôp wưng mrâo, klei kƀĭn trông ksiêm dlăng leh kơ “Hdră êlan mdrơ̆ng hŏng klei ruă tưp Covid-19 lehanăn klei mgaih msir wưng thŭn 2021-2023” lehanăn “Dŭm hdră êlan bi mguôp bruă duh mkra 2030.” Tui hluê anăn, phung khua gĭt gai dưi ba mdah leh hdră tă truh kơ thŭn 2030 kơ sa alŭ wăl ñŭ kma, mdrŏng sah lehanăn đĭ kyar kjăp, kluôm ênŭm. Bi ruê̆ klei bi kƀĭn, phung khua gĭt gai ksiêm dlăng leh kơ klei bi klă mbĭt mơ̆ng klei trông čhai lehanăn bi tŭ ư mkŏ mjing klei bi trông GMS tal 8 ti Trung Quốc hlăm thŭn 2024.

Y Ƀel pô mblang