VOV4.Êđê - Tlam mbruê, tui si mmông alŭ wăl, hlăm klei kƀĭn tal 26 dŭm tĭng nao hgŭm hŏng klei kuôl kă mơ̆ng Êpul hgŭm lu ala čar kơ klei mlih yan adiê COP26 mkŏ mjing ti ala čar Angle, Khua knŭk kna Phạm Minh Chính nao hgŭm leh anăn blŭ hlăm knăm bi êdah klei ƀuăn rơ̆ng bi hrŏ êwa čhŏ metan tar rŏng lăn mơ̆ng Khua mĭl čhil Mi Jeo Biden hŏng khua gĭt gai Dhar bruă Ơrôp gĭt gai.

Blŭ hlăm knăm anăn, Khua knŭk kna Phạm Minh Chính bi êdah klei lač jăk leh anăn yap yuôm bhăn bruă êpul mkŏ mjing, Khua mĭl čhil Mi leh anăn khua gĭt gai dhar bruă Ơrôp iêo jak nao hgŭm hlăm knăm anei. Hlăm knăm yuôm bhăn anei, Khua knŭk kna Phạm Minh Chính mơĭt 2 klei hưn mthâo, iêo mthưr jih jang bi mguôp, sa ai, hrăm mbĭt gang mkhư̆, msưh kdŭn, bi hrŏ êwa čhŏ metan. Khua knŭk kna mnă klă, anei jing boh klei tar rŏng lăn, kyuanăn čiăng mâo klei nao hgŭm tar rŏng lăn leh anăn jing klei hmăi truh kơ jing jang mnuih, kyuanăn srăng mâo klei nao hgŭm mơ̆ng jih jang.

Y Ƀel pô mblang