VOV4.Êđê- Hruê mbruê hluê mmông alŭ wăl, hlăm klei nao čuă klă klơ̆ng ala čar Prăng, Khua knŭk kna Phạm Minh Chính mâo leh klei bi tuôm hŏng khua gĭt gai Đảng Cộng sản ala čar Prăng. Hlăm klei bi tuôm anăn, Khua knŭk kna Phạm Minh Chính yap yuôm bhăn dŭm hdră êlan 2 ala čar bi tŭ ư kñăm mđĭ hĭn klei mjĕ giăm leh anăn mâo boh tŭ dưn hĭn, boh nik jing dŭm bruă dôk kdlưn hĭn ară anei hlăm klei mđĭ kyar 2 ala čar.

Bi êdah klei hơ̆k mơak kyua dŭm klei tŭ jing mơ̆ng Đảng cộng sản Việt Nam hlăm bruă gĭt ai ala čar leh anăn kơ klei mjĕ giăm 2 ala čar mâo nanao klei bi kjăp leh anăn đĭ kyar, khua gĭt Đảng cộng sản Prăng Fabien Roussel đăo knang hlăm klei čuă čhưn anei mơ̆ng Khua knŭk kna Phạm Minh Chính srăng jing boh kdrŭt đru mđĭ kyar klei mjĕ giăm 2 ala čar hlăm hruê mmông kơ anăp. Phung hlăm Đảng cộng sản Prăng mâo nao nao klei sa ai leh anăn srăng gĭr jih ai čiăng bi kjăp kei bi mguôp 2 Đảng, 2 ala čar Việt Nam – Prăng.

Pô mblang: Y-Ƀel Êban