VOV4.Êđê- Tlam mbruê, ti sang bruă knŭk kna, khua knŭk kna Phạm Minh Chính drông leh Gareth Ward, pô bi ala 2 ala čar hgŭm Angle kleh anăn dưr Ailen ti Việt Nam. Khua knŭk kna mnă klă ala čar Angle jing sa hlăm dŭm ƀĭng hgŭm bi mguôp bruă duh mkra kdlưn hĭn mơ̆ng ala čar Việt Nam ti Ơrôp, 2 ala čar čiăng bi mguôp kjăp hĭn čiăng dưi yua jih hnơ̆ng klei găl mơ̆ng klei kuôl kă mnia mblei êngiê 2 nah leh anăn lač kơ ala čar Angle lŏ pŏk phai anôk mnia mblei mnơ̆ng dhơ̆ng mơ̆ng Việt Nam, mbĭt anăn lŏ mtrŭt mjhar dŭm knơ̆ng bruă mơ̆ng Angle pŏk lar duh bi liê kơ ala čar Việt Nam, boh nik hlăm dŭm bruă mâo klei găl msĕ si bruă ngăn prăk, êa pui, êwa čuh, pui kmlă doh, bruă duh mkra mrô, bruă tuh tia mkra mjing.

Ƀri wưng anei, khua knŭk kna mâo klei lač jăk kơ khua knŭk kna leh anăn mnuih ƀuôn sang Angle mkăp brei leh 415 êbâo hnơ̆ng vaccine AstraZeneca kơ Việt Nam. Khua knŭk kna hmăng hmưi 2 ala čar lŏ bi mguôp hĭn hlăm bruă mdrao mgŭn, mđĭ klei thâo bruă mdrao mgŭn, mñă kơ Angle lŏ mkăp brei vaccine, kdrăp yua bruă mdrao mgŭn, ksiêm dlăng ba jao krăp mkra mjing vaccine, êa drao mdrao klei ruă tưp Covid-19 kơ Việt Nam.

Pô mblang: Y-Ƀel Êban