VOV4.Êđê- Tlam mbrue (18/10), ti Hà Nội, Khua lăn čar Nguyễn Xuân Phúc jing khua êpul kiă kriê bruă răng mgang klei êđăp ênang, nao hlăm knăm bi mni kơ dŭm êpul êya lehanăn mnuih mâo leh bruă tŭ jing hlăm klei đru răng mgang klei êđăp ênang hŏng Êpul hgŭm lu ala čar. Mơ̆ng mlan 6 thŭn 2014 truh kơ ară anei, Việt Nam tiŏ nao leh 246 gưl čô phung knua druh lĭng kahan Việt Nam nao ngă bruă čuăn răng mgang klei êđăp ênang mơ̆ng Êpul hgŭm lu ala čar ti dŭm ala čar Dhŭng Sudan; ala čar krah Afrĭk, lehanăn Anôk bruă Êpul hgŭm lu ala čar ti New York, ala čar Mi. Hlăm anăn mâo 3 boh sang êa drao jing jai gưl 2 mâo Êpul hgŭm lu ala čar bi mni kơ klei thâo hlăm bruă mơ̆ng phung nai êa drao kahan Việt Nam, ktur leh gru jăk siam hŏng anôk anăn kyua klei thâo uêñ, mâo bruă klam jih ai tiê kyua mnuih ruă. Bi ala kơ phung khua kiă kriê Đảng, Knŭk kna, Khua lăn čar bi mni, lehanăn mâo klei mđĭ ai phung lĭng kahan răng mgang klei êđăp ênang mơ̆ng Êpul hgŭm lu ala čar, mtă kơ Phŭn bruă lĭng kahan lŏ dơ̆ng mâo dŭm hdră êlan bi mguôp hŏng tač êngao snăn tŭ jing hĭn djŏ hŏng klei phŭn bruă kđĭ čar bi klă leh./.

Pô mblang: Y-Khem Niê