VOV4.Êđê- Lŏ dơ̆ng dŭm bruă ngă ti New York, Mi, Khua lăn čar maoa leh klei bi tuôm hŏng phung khua păn akŏ, khua gĭt gai dŭm ala čar, bi tuôm online hŏng Khua anôk bruă Thượng Viện Mi. Khua lăn čar Nguyễn Xuân Phúc ăt mâo leh klei bi trông hŏng pô bi ala dŭm ala čar jing Ala čar amâo djŏ tuôr kiă kriê hlăm Êpul hgŭm răng mgang klei êđăng êpul hgŭm lu ala čar. Bi trông hŏng pô bi ala mơ̆ng Êpul Liên bang Nga, Khua lăn čar Nguyễn Xuân Phúc bi mklă, Nga jing sa hlăm dŭm ƀĭng hgŭm yuôm bhăn mrô sa mơ̆ng Việt Nam. Anăp anei, Phung khua gĭt gai dua ala čar srăng hnưm mâo dŭm klei bi tuôm tlă anăp čiăng mđĭ ktang hĭn klei bi hgŭm Hdră bruă plah wah Việt Nam - Liên bang Nga. Hlăm klei bi trông hŏng  Khua phŭn bruă hŏng tač êngao Mi Antony Blinken, Khua lăn čar Nguyễn Xuân Phúc mni lač jăk kơ Mi jing sa hlăm dŭm ala čar đru vaccin gang mkhư̆ klei ruă Covid-19 lu hĭn kơ dŭm ala čar hlăm klei bhiăn Covax. Êlâo anăn, Khua lăn čar Nguyễn Xuân Phúc mâo leh mmông bi tuôm hŏng Mô̆ mtao Hà Lan Maxima, bi ala kơ Khua gĭt gai Êpul hgŭm lu ala čar kơ ngăn prăk, drông Khua keh prăk dlông rŏng lăn IMF Kristalina Georgieva, leh anăn lu anôk bruă mnia blei mrô sa ti Mi.

Pô mblang: H’Zawut Ƀuôn Yă