VOV4.Êđê - Hruê 21/10, ti Anôk bruă knŭk kna, Khua lăn čar Nguyễn Xuân Phuc mđup brei leh Hdră mtrŭn jao Khua bi ala wưng kỳ 2021 – 2024 krĭng wăl Ơ Rôp leh anăn krah Asi kơ 8 čô khua bi ala. Hlăm mmông drông, bi ala kơ phung Khua bi al ngă bruă klam, phung khua bi ala bi êdah klei ktưn hưn prŏng prŏn dưi ngă bruă klam Đảng, Knŭk kna leh anăn mnuih ƀuôn sang jao, mbĭt anăn bi mklă srăng gĭr jih ai tiê, bi hgŭm hŏng dŭm anôk bruă hlăm ala čar leh anăn ala tač êngao, ngă jăk hdră êlan hŏng tač êngao mơ̆ng Klei bi kƀĭn Đảng tal XIII.

Bi ala kơ Khua gĭt gai Đảng, Knŭk kna, Khua lăn čar Nguyễn Xuân Phúc hơêč hmưi kơ phung Khua bi ala mâo Đảng, Knŭk kna đaŏ knang jao bruă klam prŏng ti dŭm ala čar ti krĭng Ơ Rôp. Khua lăn čar mñă klă, anei jing klei ktưn hưn prŏng prĭn leh anăn ăt jing bruă klam kdrưh kơăm Đảng, Knŭk kna leh anăn mnuih ƀuôn sang đaŏ knang jao kơ phung khua bi ala. Anei jing gưl ba nao phung khua bi ala tal dua leh klei bi kƀĭn Đảng tal XIII, Khua lăn čar mñă klă bruă hŏng tač êngao mơ̆ng Việt Nam leh klei bi kƀĭn Đảng ăt msĕ mơh hdră kñăm mđing truh thŭn 2045, Việt Nam jing ala čar mâo prăk hrui wĭt lu.

H Zawut pô mblang