VOV4.Êđê- Tŭ ư klei iêu jak mơ̆ng khua knŭk kna Ailen Micheal Martin, khua kiă kriê djŏ tuôr mơ̆ng êpul gơ̆ng răng mgang klei êđăp ênang hlăm Êpul hgŭm lu ala čar, khua lăn čar Nguyễn Xuân Phúc nao hgŭm leh anăn mâo klei blŭ hlăm klei kƀĭn gưl dlông mơ̆ng êpul gơ̆ng răng mgang klei êđăp ênang hlăm Êpul hgŭm lu ala kơ bruă klei bi mlih yan adiê. Hlăm klei kƀĭn, khua kiă kriê êpul gơ̆ng răng mgang klei êđăp ênang hlăm Êpul hgŭm lu ala čar leh anăn phung bi ala ƀi êdah klei kyưt kyua klei hmăi amâo jăk mơ̆ng klei mlih yan adiê truh kơ klei êđăp ênang tar rŏng lăn, mñă klă êpul êya tar rŏng lăn čiăng mđĭ hĭn bruă mdrơ̆ng hŏng klei mlih yan adiê. Hlăm klei blŭ mơ̆ng pô, khua lăn čar Nguyễn Xuân Phúc mâo klei bi êdah kơ Êpul hgŭm lu ala mkŏ mnjing klei čih pioh kơ klei hmăi lu bruă mơ̆ng klei êa ksĭ đĭ čiăng mâo tur knơ̆ng bi klă dŭm hdră bi mdrơ̆ng gưl tar rŏng lăn. Khua lăn čar bi êdah klei đăo knang hŏng klei gĭr jih ai leh anăn klei bi mguôp tar rŏng lăn, dŭm ala čar srăng mâo klei mloih ktang tui si êlan mtah leh anăn kjăp truh kơ mgi dih.

Pô mblang: Y-Ƀel Êban