VOV4.Êđê - Tlam hruê 2/11, ti Ninh Bình, Khua lăn čar Nguyễn Xuân Phúc mă leh bruă hŏng phung khua kiă kriê knơ̆ng čar Ninh Bình kơ bruă hluê ngă hdră mtrŭn mơ̆ng Đảng, hdră bhiăn mơ̆ng Knŭk kna kơ hdră mđĭ kyar bruă duh mkra – ala ƀuôn lehanăn bruă duh mkra êpul êya. Blŭ hrăm ti knăm anei, Khua lăn čar lač, êngao klei đru mơ̆ng alŭ wăl kơ Êpul hgŭm bruă hlăm prăk duh bi liê, kdrăp mrâo msĕ ară anei brei mâo hdră đru kơ Êpul hgŭm bruă hlăm hdră mkŏ mjing kñăm dưi mâo sa gru hmô mkŏ mjing mrâo mrang hĭn mkă hŏng Êpul hgŭm bruă mơ̆ng đưm. Khua lăn čar mtă kơ dŭm alŭ wăl ksiêm wĭt Hdră mtrŭn tal 13 mơ̆ng Gưl dlông, mđing kơ dŭm hdră mtrŭn, mnuih mă bruă, klei găl čiăng mđĭ kyar Êpul hgŭm bruă; Đru kơ ênoh duh bi liê hlăm bruă mjuăt bi hriăm, klei thâo kơ mnuih hgŭm hlăm êpul; mtrŭt dŭm knơ̆ng prăk đru duh kơ êpul hgŭm bruă. Hluê hŏng hdră anăn, Khua lăn čar mtă kơ Phŭn bruă hdră kčah – Duh bi liê, Êpul hgŭm dŭm anôk bruă hgŭm Việt Nam lehanăn dŭm anôk bruă djŏ tuôm bi hgŭm hŏng alŭ wăl lŏ dơ̆ng ksiêm wĭt 20 thŭn bruă hluê ngă Hdră mtrŭn mrô 13 kơ klei êpul hgŭm bruă lehanăn hdră duh mkra êpul êya./.

H Nêč pô mblang