VOV4.Êđê - Tlam 8/10, ti Hà Nội, Khua lăn čar Nguyễn Xuân Phúc nao hlăm Knăm tŭ mă anăn knăl êpul lĭng kahan jhŏng ktang yang ƀuôn kơ Êpul êdam êra mtlaih ala čar Thành Hoàng Diệu; hdră bi mni kơ mnuih jăk bruă jăk êdah kdlưn leh anăn bi mni kơ mnuih ƀuôn sang ƀuôn prŏng phŭn êdah kdlưn thŭn 2021 mơ̆ng ƀuôn prŏng Hà Nội. Hdră dưi mkŏ mjing online leh anăn tlă anăp hŏng êbeh 80 anôk mkŏ kluôm ƀuôn prŏng Hà Nội. Bi ala kơ Khua gĭt gai Đảng, knŭk kna, Khua lăn čar Nguyễn Xuân Phúc mđup brei leh anăn knăl Êpul lĭng kahan jhŏng ktang yang ƀuôn kơ Êpul êdam êra mtlaih ala čar Thành Hoàng Diệu. Hlăm hƀuê ênuk ƀuôn prŏng Phŭn Hà Nội, klei tŭ dưi mơ̆ng Êpul êdam êra mtlaih ala čar thành Hoàng Diệu dưi hdơr nanao. Lŏ čuê knhuah gru êpul êdam êra đưm, hlăm dŭm thŭn êgao, phung mda asei ba anăp hlăm djăp mta bruă, đru mguôp hlăm bruă mkŏ mjing ƀuôn prŏng phŭn jing ƀuôn prŏng mbruă, kyua klei êđăp ênang, êbâo thŭn mkŏ mjing. Hlăm klei bi kƀĭn, ƀuôn prŏng Hà Nội ăt bi mni kơ phung jăk ngă bruă jăk êdah kdlưn leh anăn bi mni 9 čô mnuih ƀuôn sang ƀuôn prŏng phŭn êdah kdlưn hlăm dŭm mta bruă thŭn 2021.

H Zawut pô mblang