VOV4.Êđê- Tlam mbrue (12/10), ti ƀuôn prŏng Hồ Chí Minh, Khua lăn čar Nguyễn Xuân Phúc lehanăn Êpul bi ala Bruă kƀĭn ala ƀuôn prŏng Hồ Chí Minh ngă leh klei ksiêm dlăng bruă gang mkhư̆ klei ruă tưp Covid 19 hlue hdră mtrŭn mrô 30/2021 mơ̆ng Bruă kƀĭn ala, jih jang hră mơar mơ̆ng knŭk kna, Khua knŭk kna, jih jang djăp hdră pioh gang mkhư̆ klei ruă tưp Covid 19, mđĭ kyar bruă duh mkra ala ƀuôn ti ƀuôn prŏng wưng kơ anăp.

Khua lăn čar Nguyễn Xuân Phúc mâo leh klei mđĭ ai hŏng Êpul bruă Đảng, Bruă sang čư̆ êa lehanăn phung ƀuôn sang ƀuôn prŏng kyua klei luič liê, klei rŭng ênguôt mơ̆ng klei ruă tưp. Čiăng lŏ kơrŭ wĭt bruă duh mkra ti ƀuôn prŏng, Khua lăn čar lŏ mtă kơ ƀuôn prŏng mđĭ hĭn klei bi hơĭt jih jang bruă duh mkra, kơ klei dŭ mdiăng mnơ̆ng dhơ̆ng, lehanăn iêo jum anak mnuih, kơ dŭm klei ngăn prăk, klei brei čan prăk, ênoh bi tĭng tla hŏng phung duh mkra, lŏ mkŏ jih jang bruă duh mkra mnia mblei lehanăn mnuih ngă bruă. Mbĭt hŏng anăn jing kơrŭ bruă mơ̆ng phung duh mkra, bi trông čiăng păn kjăp ya mta klei dleh dlan mơ̆ng grăp mta bruă./.

Pô mblang: Y-Khem Niê