VOV4.Êđê - Aguah mbruê, ti čar Ninh Bình, Khua lăn čar Nguyễn Xuân Phúc nao čuă dlăng leh dŭm klei bi hmô êpul bi mguôp mkra mjing leh anăn klei ngă bruă mâo boh tŭ dưn, mkŏ mjing lu bruă mă kơ mnuih mă bruă hlăm alŭ wăl, anăn jing êpul bi mguôp mkra mjing mnơ̆ng hŏng lăn čuh Bồ Bát kdriêk Yên Mô leh anăn êpul bi mguôp Sinh Dược kdriêk Gia Viễn. Ƀri wưng anei, Khua lăn čar Nguyễn Xuân Phúc mtă kơ khua gĭt gai čar Ninh Bình, dŭm kdriêk Gia Viễn, Yên Mô, êpul bi mguôp Việt Nam ti čar Ninh Bình, ngă klei găl kơ dŭm êpul bi mguôp dưi đĭ kyar, mkŏ mjing lu bruă knuă kơ mnuh mă bruă, mđĭ kyar alŭ wăl.

Hlăm anăn čiăng mâo klei uêñ mĭn đru kơ ngăn prăk, anôk ngă bruă, mtô mjuăt klei ngă bruă, hưn mdah leh anăn bi lar mnơ̆ng dhơ̆ng truh kơ anôk mnia mblei, boh nik jing dŭm mnơ̆ng dhơ̆ng mâo klei mlih mrâo, mâo klei khăp čiăng hlăm anôk mnia mblei msĕ si êpul bi mguôp Sinh Dược leh anăn Bồ Bát. Mbĭt hŏng anăn jing đru kơ dŭm êpul bi mguôp dưi đĭ kyar tui si mnơ̆ng dhơ̆ng mâo ênoh, dưn yua kdrăp kreh knhâo mrâo mrang čiăng mâo mnơ̆ng dhơ̆ng tŭ jăk, djăp kơ giăm 100 êklăk čô mnuih ƀuôn sang Việt Nam leh anăn dưi ba čhĭ kơ ala tač êngao.

Y Ƀel pô mblang