VOV4.Êđê- Aguah mbruê, Khua lăn čar Nguyễn Xuân Phúc nao hgŭm leh hlăm knăm bi hdơr 190 thŭn hruê mkŏ mjing čar Lạng Sơn leh anăn mđup brei kơ čar Lạng Sơn mêdai klei êngiê gưl tal 1. Bi ala kơ phung khua gĭt gai Đảng, knŭk kna, Khua lăn čar Nguyễn Xuân Phúc mâo leh klei êmuh leh anăn hơêč hmưi jih jang klei jăk hĭn kơ bruă Đảng čar, bruă sang čư êa leh anăn mnuih ƀuôn sang dŭm djuê ana ti čar Lạng Sơn.

Dŭm boh tŭ dưn yuôm bhăn, kluôm ênŭm mơ̆ng bruă Đảng čar, bruă sang čư êa leh anăn mnuih ƀuôn sang čar Lạng Sơn dưi mâo hlăm hruê mmông êgao jing năng hing ang êdi, mâo Đảng leh anăn knŭk kna yap yuôm bhăn, hƀuê ênuk knhuah gru dưi bi msiam hĭn hŏng dŭm klei tŭ jing, klei đru mguôp hlăm bruă răng mgang leh anăn đĭ kyar ala čar. Boh nik jing 30 thŭn mlih mrâo. Mbĭt hŏng bruă mđĭ kyar bruă duh mkra, Khua lăn čar mtă kơ čar Lạng Sơn lŏ uêñ mĭn mđĭ kyar dhar kreh, yang ƀuôn, rơ̆ng klei hơĭt hlăm klei hdĭp, kñăm kơ bruă mtô mjuăt bi hriăm, klei kreh knhâo, mrâo mrang, bruă mdrao mgŭn, mđĭ klei suaih pral mnuih ƀuôn sang.

Pô mblang: Y-Ƀel Êban