VOV4.Êđê- Khua lăn čar Nguyễn Xuân Phúc mrâo nao hgŭm hlăm knăm bi hdơr 60 thŭn hruê mkŏ mjing êpul kahan ksiêm Ngoại tuyến (jing êpul kăp ksiêm hŏng klei hgăm djăp mta bruă) (29/9) leh anăn mđup brei Mêđai răng mgang ala čar Mrô 2 kơ anôk bruă kahan ksiêm anei, hlăm phŭn bruă kahan ksiêm.

Blŭ hlăm knăm anăn, khua lăn čar yap yuôm bhăn dŭm klei ngă bruă mơ̆ng anôk bruă kăp ksiêm hŏng klei hgăm djăp mta bruă mâo nanao ai tiê tŭ klei knap mñai, dleh dlan, bi blah, êngiă asei čiăng dưi ngă bi leh bruă klam pô, mâo lu klei tŭ jing, mâo bruă ngă kdlưn hlăm klei bi blah kdơ̆ng hŏng Mi leh anăn wăt kơ wưng ară anei, đru bi mbŏ knhuah gru jhŏng ktang mơ̆ng kahan ksiêm Việt Nam. Khua lăn čar mtă kơ anôk bruă kăp ksiêm hŏng klei hgăm lŏ bi lar knhuah gru anôk bruă jhŏng ktang, mkŏ mjing bruă Đảng hlăm êpul bruă anei leh anăn êpul kahan ksiêm anei mâo klei kjăp hlăm bruă kđi čar, klei mĭn, knhuah hdĭp leh anăn wăt kơ bruă ngă.

Pô mblang: Y-Ƀel Êban