VOV4.Êđê - Tŭ ư klei iêo jak mơ̆ng khua mil čhil Kenya, Khua gĭt gai djŏ tuôr Êpul gơ̆ng răng mgang klei êđăp ênang mơ̆ng êpul hgŭm lu ala mlan 10/2021, mmăt hruê mbruê, Khua lăn čar Nguyễn Xuân Phúc nao hgŭm leh anăn mâo klei blŭ hlăm klei kƀĭn bi trông gưl dlông kơ klei bi mguôp Êpul hgŭm lu ala leh anăn Êpul hgŭm Afrik hŏng akŏ “Mđĭ klei bi mguôp kyua klei êđăp ênang leh anăn klei êđăp ênang hlăm sa wăl mjhĭk mtŭl dôk mâo klei mlih.” Bruă khua lăn čar Nguyễn Xuân Phúc nao hgŭm hlăm klei kƀĭn anei bi êdah bruă klam, klei đru mguôp mơ̆ng Việt Nam hlăm bruă mđĭ klei bi mguôp mơ̆ng Êpul hgŭm lu ala hŏng dŭm êpul êya hlăm alŭ wăl. Mbĭt anăn lŏ čuê kơ dŭm klei tŭ jing dưi mâo hlăm mlan Việt Nam ngă khua gĭt gai Êpul gơ̆ng răng mgang klei êđăp ênang mơ̆ng êpul hgŭm lu ala hlăm mlan 4/2021. Hlăm klei bi trông anăn, Khua lăn čar Nguyễn Xuân Phúc yap yuôn bhăn dŭm klei tŭ jing, klei gĭr đĭ kyar leh anăn ñŭ kma hŏng tar rŏng lăn mơ̆ng Afrik hlăm hruê mmông êgao. Afrik ară anei duôm tuôm hŏng dŭm klei mjhĭk mtŭl, luič klei êđăp ênang leh anăn klei ruă tưp Covid-19.

Y Ƀel pô mblang