VOV4.Êđê - Êpul khua bi ala gưl dlông Việt Nam mâo khua lăn čar Nguyễn Xuân Phúc djă akŏ nao ti anôk bi kƀĭn gưl dlông tal 76, Klei bi kƀĭn prŏng Êpul Gơ̆ng mơ̆ng Êpul hgŭm lu ala čar. Aguah mbrue (21/9), tui si mmông New York, ti anôk bruă Êpul hgŭm lu ala čar, hlăm ƀuôn prŏng New York, ala čar Mi, klei bi trông gưl dlông tal 76 mơ̆ng klei bi kƀĭn prŏng Êpul Gơ̆ng mơ̆ng Êpul hgŭm lu ala čar pŏk leh hŏng anăn: “hrăm mbĭt bi jưh knang, lehanăn čŏng kpưn đĭ – anăp truh kơ klei lŏ kơrŭ wĭt leh klei ruă tưp Covid 19, rŭ mdơ̆ng hŏng klei kjăp, răng mgang boh lăn, mtrŭt mđĭ klei dưi êngiê anak mnuih, lehanăn mđĭ mlih bruă Êpul hgŭm lu ala čar”. Blŭ hrăm ti anôk bi kƀĭn Abdulla Shahid, Khua kiă kriê Klei bi kƀĭn prŏng Êpul gơ̆ng mơ̆ng Êpul hgŭm lu ala čar tal 76 ƀuăn srăng mtrŭt klei bi mguôp kjăp jih jang ala čar hlăm bruă mdrơ̆ng hŏng klei ruă tưp, lŏ kơrŭ wĭt lehanăn mđĭ kyar leh klei ruă tưp hŏng klei kjăp, tui si hdră dăp leh truh kơ thŭn 2030, kyua klei đĭ kyar hơĭt. Klei trông čhai gưl dlông srăng lŏ mkŏ mjing truh kơ hrue 27/9, lehanăn tui si hdră, khua lăn čar, khua lăn čar Nguyễn Xuân Phúc srăng mâo klei blŭ hrăm yuôm bhăn hlăm tlam hrue 22/9 hlue mmông New York./.

Y Khem pô mblang