VOV4.Êđê- Khua lăn čar Nguyễn Xuân Phúc mrâo mâo leh klei bi blŭ hrăm hlăm đĭng blŭ hŏng khua mil čhil Nga Putin. Dua čô khua gĭt gai bi trông leh kơ dŭm bruă ti anăp, mđĭ hĭn klei bi hgŭm kluôm dhuôm Việt Nam – Nga, hgŭm mdrơ̆ng hŏng klei ruă tưp Covid 19, lehanăn kơ dŭm bruă hlăm alŭ wăl lehanăn tar rŏng lăn dua ala čar mâo klei mđing.

Khua lăn čar Nguyễn Xuân Phúc lač Việt Nam êlâo êdei ăt msĕ dlăng yuôm klei bi mguôp mâo leh mơ̆ng đưm lehanăn mđĭ hĭng klei bi mguôp kluôm dhuôm hŏng Nga; čang hmăng srăng mâo klei hgŭm plah wah dua ala čar hlăm djăp mta bruă kyua klei tŭ dưn kơ dua djuê ana. Kơ klei hgŭm Việt Nam – Nga, Khua lăn čar Nguyễn Xuân Phúc lehanăn Khua mil čhil Nga bi êdah klei mơak ti anăp boh tŭ dưn hlăm bruă bi mguôp dua nah wưng leh êgao. Dua khua gĭt gai ăt bi trông kơ dŭm ala hlăm alŭ wăl lehanăn tar rŏng lăn, bi klă srăng lŏ hyua kjăp hĭn lehanăn mâo klei tŭ dưn hĭn hlăm djăp bruă bi kƀĭn alŭ wăl, hlăm anăn mđing mghaih msir dŭm klei dôk bi mmiă hlăm Êa Ksĭ Ngŏ hlue hŏng hdră êđăp ênang./.

Pô mblang: Y-Khem Niê