VOV4.Êđê - Hlăm hruê mă bruă tal êlâo ti New York, ala čar Mi, 21/9 hluê si mmông alŭ wăl, Khua lăn čar Nguyễn Xuân Phúc mâo leh klei bi tuôm hŏng khua gĭt gai gưl dlông dŭm ala čar leh anăn Khua Knơ̆ng prăk dlông rŏng lăn. Hlăm klei bi tuôm hŏng Khua mil čhil Hàn Quốc Moon Jae-In, Khua mil čhil Hàn Quốc čang hmăng mđĭ ktang hĭn klei bi hgŭm bruă hŏng Việt Nam, gĭr mâo prăk hrui wĭt mnia blei 100 êklai USD hlăm thŭn 2030, mđĭ ktang klei bi hgŭm hlăm dŭm bruă duh mkra mrô, êa drao, ngăn prăk… Hlăm boh klei ruă Covud-19, Khua mil čhil Moon jae-in lač, Knŭk kna Hàn Quốc bi mklă đru Việt Nam êbeh 1 êklăk aruăt vaccin leh anăn srăng ba jao kơ Việt Nam hlăm mlan 10 kơ anăp. Hlăm klei bi tuôm hŏng Micheal Martin, Khua knŭk kna Ailen, ala čar gĭt gai djŏ tuôr hlăm Êpul hgŭm răng mgang lu ala čar mlan 9/2021, Khua lăn čar mtă leh dưi ktuê dlăng jăk klei ruă tưp, dua tĭng hnưm lŏ mkŏ wĭt bruă bi trông êpul leh anăn bi tuôm gưl dlông, mđĭ klei bi hgŭm hlăm dŭm mta bruă mkăn. Ăt hlăm hruê 21-9, Khua lăn čar ăt mâo leh lu klei bi tuôm hŏng phung khua păn akŏ ala čar, khua gĭt gai gưl dlông dŭm ala čar Thái Lan, Bangladesh, Sri Lanka, Latvia, Thụy Điển, Guyana, Lesotho, Costa Rica, Colombia, Uruguay bi trông lu hdră klă sĭt čiăng mđĭ ktang klei bi hgŭm hŏng dŭm ala čar tŭ dưn leh anăn êlam hĭn.

H Zawut pô mblang