VOV4.Êđê - Hlăm klei nao hgŭm hlăm klei kƀĭn prŏng êpul gơ̆ng mơ̆ng Êpul hgŭm lu ala gưl 76, Khua lăn čar Nguyễn Xuân Phúc bi tuôm hŏng khua gĭt gai êpul gơ̆ng Áp-đu-la Sa-hít, leh anăn khua kiă kriê Êpul hgŭm lu ala An-tô-ni-ô Gu-tê-rết. Hlăm klei bi tuôm anăn, khua lăn čar Nguyễn Xuân Phúc mñă klă bruă Việt Nam dlăng yuôm bhăn leh anăn sa ai hŏng bruă klam mơ̆ng êpul hgŭm lu ala čar hlăm klei ksiêm dlăng tar rŏng lăn kñăm bi mdrơ̆ng hŏng dŭm klei lông dlăng prŏng ară anei, leh anăn hmăng hmưi mtrŭt mđĭ klei bi mguôp kluôm hŏng Êpul hgŭm lu ala. Khua lăn čar Nguyễn Xuân Phúc brei thâo, ala čar Việt Nam dôk gĭr jih ai hlăm bruă  mdrơ̆ng hŏng klei ruă tưp Covid-19 dôk dleh dưi ksiêm dlăng, mdưm klei êđăp ênang leh anăn klei suaih pral mnuih ƀuôn sang jing tal êlâo hĭn, mbĭt anăn mâo klei lač jăk kơ hdră COVAX leh anăn dŭm êpul êya mơ̆ng Êpul hgŭm lu ala mkăp brei leh vaccine, mơ̆ng yua, kdrăp yua leh anăn klei đru kčĕ đru kơ bruă gang mkhư̆ leh anăn klei mgaih msir leh êgao klei ruă tưp. Akâo kơ Êpul hgŭm lu ala lŏ đru kơ Việt Nam hlăm hruê mmông kơ anăp, boh nik jing bruă tlŏ mgang vaccine kluôm kơ mnuih ƀuôn sang.

Y Ƀel pô mblang