VOV4.Êđê- Ti ƀuôn prŏng Hồ Chí Minh, khua lăn čar nguyễn Xuân Phúc mrâo mâo klei bi tuôm hŏng phung bi ala kdriêk Củ Chi leh anăn Hóc Môn hŏng êlan online, hâo hưn bruă mprăp kơ klei kƀĭn tal 3 bruă kƀĭn ala gưl 15. Hlăm klei bi tuôm anăn, phung bi ala bi êdah klei lač jăk kơ Đảng, knŭk kna leh anăn grăp êpul êya hlăm ala čar leh anăn tač êngao mâo leh klei uêñ mĭn, gĭt gai, đru kơ ƀuôn prŏng Hồ Chí Minh gang mkhư̆ leh anăn ksiêm dlăng klei ruă tưp msĕ ară anei. Khua lăn čar Nguyễn Xuân Phúc brei thâo, phŭn bruă kđi čar mâo leh lu klei kƀĭn kñăm dưi ba mdah dŭm hdră êlan gĭt gai knŭk kna, êpul gĭt gai bruă gang mkhư̆ klei ruă tưp, hlăm anăn mâo hdră mlih mơ̆ng Zero Covid jing hdĭp êđăp ênang hŏng Covid.

Hruê mmông êgao, khua lăn čar lač klă, vaccine leh anăn 5 klei mtă mơ̆ng phŭn bruă mdrao mgŭn jing yuôm bhăn êdi, mă klei hriăm mơ̆ng bruă gang mkhư̆ klei ruă tưp ti Việt Nam leh anăn tar rŏng lăn. Hŏng bruă ƀuôn prŏng Hồ Chí Minh ƀrư̆ hruê ƀrư̆ dưi ksiêm dlăng klei ruă tưp, khua lăn čar lŏ lač, kdriêk Củ Chi leh anăn Hóc Môn čiăng ksiêm dlăng, mgaih msir dŭm klei kpăk êgun čiăng mkŏ mjing klei găl kơ knơ̆ng bruă, êpul bi mguôp leh anăn mnuih ƀuôn sang krŭ wĭt bruă mkra mjing, bruă mă, prăk ba wĭt leh anăn bi hơĭt klei hdĭp hlăm yang ƀuôn.

Pô mblang: Y-Ƀel Êban