VOV4.Êđê- Lŏ dơ̆ng hdră mă bruă ti New York, ala čar Mi, hruê 22/9, hluê mmông New York, Khua lăn čar Nguyễn Xuân Phúc mâo leh klei bi tuôm hŏng Khua mil čhil dŭm ala čar Mônggôl, Swip, Austria lehanăn Khua kiă kriê Êpul hgŭm Ơrôp. Ti anôk bi tuôm hŏng Khua mil čhil Mônggôl, Khua lăn čar Nguyễn Xuân Phúc lehanăn Khua mil čhil Mônggôl mñă klă, dua ala čar bi myuôm klei bi mjĕ jăk siam mơ̆ng đưm, klei sa ai, klei đru hdơ̆ng găp hlăm hdră mkŏ mkra lăn čar ară anei. Ti anôk bi tuôm hŏng Khua mil čhil Swip Guy Parmelin, dua khua kiă kriê mñă brei mtrŭt mđĭ hdră bi hgŭm hlăm bruă duh mkra mnia mblei; mtrŭt mđĭ hdră bi hgŭm mđĭ kyar wưng thŭn 2021 – 2024 hŏng ênoh ODA 80 êklăk USD mâo Swip ƀuăn rơ̆ng. Dua khua kiă kriê tŭ ư, dua tĭng brei tui duah hdră msir kñăm krŭ wĭt hdră bi trông bruă mnia mblei hlăk hmăi mơ̆ng klei ruă Covid 19, hlăm anăn brei mtrŭt mđĭ pral hdră bi mklă FTA plah wah Việt Nam lehanăn Êpul hgŭm bruă Mnia mblei êngiê Ơrôp (EFTA). Ti anôk bi tuôm hŏng Khua mil čhil Austria, Khua lăn čar Nguyễn Xuân Phúc akâo kơ Austria mjing klei găl kơ Việt Nam hlăm hdră ba jao kdrăp mrâo hlăm bruă mkra mjing, ksiêm dlăng hdră đru kơ kdrăp mnơ̆ng mdrao mgŭn čiăng đru kơ Việt Nam pral dưi ksiêm dlăng lehanăn msưh kdŭn klei ruă tưp./.

Pô mblang: H’Nêč Êñuôl