VOV4.Êđê- Khua lăn čar mâo leh klei blŭ hrăm ti anôk trông čhai gưl 76 Klei bi kƀĭn prŏng Êpul Gơ̆ng mơ̆ng Êpul hgŭm lu ala čar hŏng anăn: “Hrăm mbĭt bi đăo knang lehanăn čŏng kpưn đĭ – anăp truh kơ klei kơru wĭt leh klei ruă tưp covid 19, rŭ mdơ̆ng hŏng klei kjăp, rwang mgang boh lăn, mtrŭt mđĭ klei dưi êngiê anak mnuih lehanăn mđĭ mlih Êpul hgŭm lu ala čar”. Hlăm klei pô blŭ hrăm, Khua lăn čar bi êdah dŭm klei luič liê amâo dưi lŏ mkă ôh mơ̆ng klei ruă tưp Covid 19, hưn lač, klei ruă tưp prŏng anei jing tiêng liêng êyuh brei jih jang mâo klei răng mjêč kơ klei bi rai prŏng kyua klei ruă tưp lehanăn klei bi mlih yan adiê, tơdah ăt dôk hlăm klei amâo mâo thâo uêñ, gang mkhư̆ hĕ bi pral, êjai dôk kbưi. Hŏng bruă klam mơ̆ng Êpul hgŭm lu ala čar, Khua lăn čar čang hmăng Êpul bruă anei lŏ dơ̆ng bi êdah bruă pô halwm klei bi mguôp lu tĭng, kiă kriê bruă knuă hŏng klei tŭ jing, djăp mta klei dôk mdrơ̆ng hŏng klei lông dlăng hlăm tar rŏng lăn, amâo mâo djŏ knŏng kơ sa ala čar ôh dưi mghaih msir hĕ. Bruă mjêč ară anei jing mkhư̆ klei ruă tưp Covid 19 hlăm tar rŏng lăn, mkăp bi djăp vaccine kơ dŭm ala čar ƀun, đru kơ dŭm ala čar hlăk đĭ kyar mâo kdrăp pioh mkra mjing lehanăn dưi dưn yua djăp ênŭm vaccine./.

Pô mblang: Y-Khem Niê