VOV4.Êđê - Tlam mbrue (3/11), hlăm hdră bi hdơr 190 thŭn hrue mkŏ mjing čar Lạng Sơn, Khua lăn čar Nguyễn Xuân Phúc bi tuôm, mă bruă hŏng phung khua kiă kriê knơ̆ng car Lạng Sơn. Blŭ hrăm ti anôk mă bruă, Khua lăn čar Nguyễn Xuân Phúc bi myuôm čar Lạng Sơn, khădah dôk hlăm klei ruă tưp ƀiădah ăt ngă jăk bruă duh mkra ala ƀuôn, bruă răng mgang klei êđăp ênang. Hlăm anăn dŭm ênoh čuăn klei mđĭ kyar, klei hrui jiă, lehanăn duh mkra mnia mblei mâo leh klei tŭ dưn jăk.

Siămdah, Khua lăn čar ăt mtă kơ čar Lạng Sơn bi ktuh êyuh ai dưi ngă bruă, duh bi liê ngăn prăk lehanăn anak mnuih, mâo hdră êlan jăk kơ bruă mđĭ kyar, tui hlue hŏng 3 kmeh gơ̆ng phŭn kơ klei duh mkra ti Lạng Sơn anăn jing klei duh mkra ti ƀang jang knông lăn, mđĭ kyar bruă hiu čhưn ênguê hŏng klei kjăp, bruă lŏ hma thâo mĭn mguôp hŏng bruă mkra mjing boh mơ̆ng bruă lŏ hma pioh čhĭ kơ ala tač êngao, răng mgang dliê bi kjăp, mđĭ kyar dliê, mđĭ kyar bruă duh mkra mơ̆ng dliê, dưn yua jih klei găl mơ̆ng ana boh kroh, ana êa drao. Mbĭt hŏng anăn, lŏ dơ̆ng mđĭ mlih hdră êlan duh bi liê čiăng dưi dôk hlăm ênoh đĭ kyar man dưn hlăm kluôm ala./.

Y Khem pô mblang