VOV4.Êđê - Aguah hruê 22/10, bi ala phung khua kiă kriê Đảng, knŭk kna, Mặt trận čar kwar Việt Nam, Khua lăn čar Nguyễn Xuân Phúc truh leh ti Tổ đình Viên Minh (Sang yơng Ráng), să Quang Lãng, kdriêk Phú Xuyên, ƀuôn prŏng Hà Nội nao čang ênuh Đại lão Hòa thượng Thích Phổ Tuệ, Đức Pháp gĭt gai Êpul hgŭm klei đăo Yơng Việt Nam. Ti knăm anei, Khua lăn čar Nguyễn Xuân Phúc leh dưm leh kwang mnga, čuh brui mngưi lehanăn bi hdơr kơ Đại lão Hòa thượng Thích Phổ Tuệ. Đại lão Hòa thượng Thích Phổ Tuệ jing Đức Pháp kiă kriê Êpul hgŭm klei đăo Yơng Việt Nam, Khua hlăm Dhar bruă mặt trận čar kwar gưl dlông Việt Nam. Đại lão Hòa thượng Thích Phổ Tuệ jing phung yơng hing ang, jih klei hdĭp jăk ênang, răk kinh čih hră, Đại lão Hòa thượng nao hgŭm leh hlăm bruă čih mkra, mblang lu klei ksiêm hriăm kơ Đăo Yơng ti Việt Nam. Klei hdĭp Hòa thượng jing sa klei bi mklă kơ boh tŭ yuôm dhar kreh, knhuah hdĭp mơ̆ng phung đăo Yơng hlăm yang ƀuôn. Hŏng dŭm klei đru mguôp prŏng prĭn kơ lăn čar, Hòa thượng Thích Phổ Tuệ mâo leh Knŭk kna tŭ yap lehanăn jao Klei pah mni Medai Hồ Chí Minh mbĭt hŏng lu klei pah mni yuôm bhăn mkăn./.

H Nêc pô mblang