VOV4.Êđê -  Ƀri hlăm wưng mlan ngă bruă kyua mnuih khua thŭn Việt Nam thŭn 2021 jing mlan 10. Khua lăn čar Nguyễn Xuân Phúc nao čuă leh anăn mă bruă hŏng dŭm knơ̆ng bruă kdlưn hĭn mơ̆ng phung mnia mblei khua thŭn ksiêm dlăng ti Hưng Yên leh anăn Hà Nội, kñăm pah mni, mđĭ ai phung ngă bruă kdlưn jing phung khua thŭn, ksiêm dlăng dlăng knơ̆ng bruă. leh nao čuă dŭm knơ̆ng bruă, khua lăn čar Nguyễn Xuân Phúc mâo leh klei mă bruă hŏng khua gĭt gai ƀuôn prŏng Hà Nội leh anăn phung bi ala mnuih khua thŭn kdlưn hĭn hlăm klei ngă bruă ksiêm dlăng knơ̆ng bruă.

Blŭ hlăm klei mă bruă anăn, Khua lăn čar Nguyễn Xuân Phúc yap yuôm bhăn kyua ƀuôn prŏng Hà Nội dưi ngă jăk bruă gang mkhư̆ klei ruă tưp Covid-19, truh kơ ară anei êbeh kơ 95% ênoh mnuih ƀuôn sang tlŏ mgang leh sa aruăt vaccine gang mkhư̆ klei ruă tưp Covid-19, aruăt tal 2 êbeh 57%, mbĭt anăn dưi ngă jăk bruă đru kơ mnuih ƀuôn sang, knơ̆ng bruă mâo klei hmăi kyua klei ruă tưp Covid-19 leh anăn dŭm hdră êlan bi hơĭt klei hdĭp hlăm yang ƀuôn, hlăm anăn mâo klei uêñ mĭn kơ mnuih khua thŭn, đru ai dưi leh anăn kriê dlăng klei suaih pral hŏng ai dưi êbeh 734 êklai prăk sa thŭn.

Y Ƀel pô mblang