VOV4.Êđê - Leh klei tŭ jing mơ̆ng klei nao čuă ala čar Cuba, tlam mbruê, tui si mmông alŭ wăl, jing aguah ưm anei ti Việt Nam, khua lăn čar Nguyễn Xuân Phúc kčưm nao ti ala čar Mi, nao hlăm klei bi kƀĭn trông čhai gưl dlông gưl 76 mơ̆ng klei kƀĭn prŏng êpul gơ̆ng mơ̆ng Êpul hgŭm lu ala čar lehanăn ngă dŭm bruă 2 tĭng ti Mi. Bruă ngă yuôm bhăn anei kñăm bi sĭt hdră êlan mơ̆ng klei kƀĭn kluôm Đảng tal 13 bi êdah leh êlâo anăn. Mtrŭt mđĭ lehanăn mđi kơhưm bruă hŏng tač êngao lu tĭng mơ̆ng Việt Nam truh kơ thŭn 2030. Hŏng klei nao hgŭm mơ̆ng giăm 100 čô khua êmua, khua gĭt gai gưl dlông, klei kƀĭn prŏng Êpul Gơ̆ng mơ̆ng êpul hgŭm lu ala čar gưl 76 jing mmông găl ngă dŭm bruă bi mtuôm 2 tĭng plah wah phung khua gĭt gai dŭm ala čar leh sui hruê amâo dưi bi mtuôm kyua klei ruă tưp Covid-19. Khua lăn čar Nguyễn Xuân Phúc ăt lŏ mâo bruă ngă 2 tĭng hŏng êpul hgŭm lu ala čar lehanăn Mi, mtrŭt mđĭ klei bi mguôp kluôm dôk đĭ kyar jăk, djŏ hŏng bruă kñăm, klei jăk mbĭt 2 ala čar Việt Nam - Mi.

Y Ƀel pô mblang