VOV4.Êđê- Aguah hruê 25/10, ti Hà Nội, Khua lăn čar Nguyễn Xuân Phúc nao leh ti Knăm bi hdơr 75 thŭn hruê Knhuah gru Sang hră ksiêm hriăm bruă răng mgang klei êđăp ênang yang ƀuôn, tŭ mă Medai Kdơ̆ng mblah mrô Sa lehanâ̆n mphŭn pŏk thŭn hriăm mrâo 2021 – 2022. Bi ala phung khua kiă kriê Đảng, Knŭk kna, Khua lăn čar Nguyễn Xuân Phúc mđup brei leh Medai Kdơ̆ng mblah mrô Sa kơ Sang hră ksiêm hriăm bruă răng mgang klei êđăp ênang yang ƀuôn lehanăn tông hgơr mphŭn pŏk thŭn hriăm mrâo. Ti knăm anei, Khua lăn čar mtă kơ Sang hră ksiêm hriăm bruă răng mgang klei êđăp ênang yang ƀuôn brei bi mlih klei mĭn lehanăn hdră ngă čiăng mkŏ mkra Sang hră klă sĭt năng hŏng bruă klam, lŏ dŏng bi leh êdah kdlưn bruă klam mjuăt bi hriăm, đru răng mgang klei êđăp ênang ala čar, klei êđăp ênang ala ƀuôn; Lŏ dŏng mlih mrâo kluôm dhuôm hlăm hdră mjuăt bi hriăm, mjing klei bi mlih kơ hnơ̆ng jăk, boh tŭ dưn kñăm mkăp, thiăm mbŏ mnuih mă bruă, knuă druh mâo klei thâo, djŏ hŏng klei čiăng mŏng êpul kahan ksiêm yang ƀuôn êdah kdlưn, thâo, knhăk, mrâo mrang, mkăp mâo boh tŭ dưn kơ bruă klam răng mgang lehanăn kriê dlăng knŭk kna hlăm bruă răng mgang klei êđăp ênang ala čar hlăm boh klei mrâo./.

                                                    Pô mblang: H’Nêč Êñuôl