VOV4.Êđê - Lŏ čuê dŭm bruă mă ti Mi bri wưng nao hgŭm hlăm klei kƀĭn prŏng êpul gơ̆ng mơ̆ng Êpul hgŭm lu ala gưl 76 mơ̆ng hruê 20-25/09/2021, ti ƀuôn prŏng New York, khua lăn čar Nguyễn Xuân Phúc tŭ drông phung ƀĭng hgŭm ti Mi, mơ̆ng aduôn Merle Ratner, khua đru kčĕ bruă mơ̆ng êpul mtrŭt mjhar đru dŏng mnuih djŏ klei ruă jŭ jhat Diosin Việt Nam ti Mi ngă khua êpul. Hlăm klei tŭ drông anăn, khua lăn čar Nguyễn Xuân Phúc mâo klei lač jăk kyua klei sa ai mơ̆ng phung ƀĭng hgŭm ti Mi mâo leh lu bruă ngă đru dŏng dŭm čô mâo klei ruă jŭ jhat Diosin, djŏ boh mtuh leh klei bi blah ti ala čar Việt Nam. Khua lăn čar mñă klă, leh êbeh 25 thŭn bi jăk klei êrô êbat Việt Nam - Mi dưi ƀrư̆ hruê ƀrư̆ êlam, mâo boh tŭ dưn leh anăn kjăp. Hlăm anăn, yap yuôm bhăn klei kuôl kă leh anăn klei đru mơ̆ng Mi hlăm bruă mgaih msir dŭm klei truh kyua klei blah mngă, đru mđĭ klei đăo knang hŏng klei gĭr mơ̆ng 2 tĭng. Khua lăn čar bi êdah klei hmăng hmưi phung ƀĭng hgŭm mơ̆ng Mi lŏ đru kơ klei bi mguôp wah 2 ala čar boh nik hlăm bruă mgaih msir dŭm klei truh mơ̆ng klei ruă jŭ jhat Diosin.

Y Ƀel pô mblang