VOV4.Êđê- Tŭ ư klei iêu jăk mơ̆ng Đại tướng Phan Văn Giang - khua hlăm phŭn bruă kđi čar, khua phŭn bruă lĭng kahan Việt Nam, Kishi Nobuo - khua phŭn bruă lĭng kahan Nhật Bản klă klơ̆ng hriê čuă ala čar Việt Nam mơ̆ng hruê 10-12/9. 2 čô khua phŭn bruă mâo leh klei blŭ hrăm êlan đĭng blŭ, yap yuôm bhăn klei mjĕ mgiăm hlăm hruê mông leh êgao, bi trông kơ dŭm boh klei hlăm alŭ wăl lehanăn tar rŏng lăn mâo klei uêñ mĭng mơ̆ng 2 tĭng.

Hlăm anăn mâo wăt klei yuôm bhăn hlăm bruă mâo klei êngiê dŭ mdiăng êlan êa lehanăn êlan êdeh phiơr ti anăp dŭm klei dleh ksiêm dlăng hlăm alŭ wăl. 2 tĭng lŏ sa blư̆ mñă klă klei yuôm bhăn hlăm bruă ngă djŏ klei bhiăn tar rŏng lăn, mâo wăt klei kuôl kă êpul hgŭm lu ala čar kơ klei bhiăn êa ksĭ thŭn 1982 (UNCLOS 1982). Kah mbha kơ klei thâo hlăm bruă gang mkhư̆ klei ruă tưp Covid-19 mơ̆ng lĭng kahan grăp ala čar. Hlăm wưng mđĭ kyar mrâo mơ̆ng klei bi mguôp bruă lĭng kahan Việt Nam - Nhật Bản, 2 tĭng mñă klă srăng mtrŭt mđĭ dŭm bruă bi mguôp, boh nik dŭm klei bi tuôm lehanăn bi mguôp lu tĭng, kñăm đru mguôp kơ klei êđăp ênang lehanăn hơĭt kjăp, đĭ kyar hlăm alŭ wăl lehanăn tar rŏng lăn.

Pô mblang: Y-Khem Niê