VOV4.Êđê- Hruê 11/10, Đại tướng Tô Lâm, Khua phŭn bruă Kahan ksiêm mâo leh klei bi tuôm online hŏng Josephine Teo, Khua phŭn bruă Mtô mblang lehanăn hâo hưn hlŏng ngă Khua phŭn bruă klam hdră răng mgang êlan mạng Singapore. Khua phŭn bruă Tô Lâm lač klă, klei bi mjĕ ƀĭng hgŭm phŭn Việt Nam - Singapore hlăm wưng êgao amâo mdei dưi bi kjăp lehanăn mđĭ kyar hlăm lu mta bruă. Klei bi mjĕ hgŭm bruă plah wah Phŭn bruă kahan ksiêm Việt Nam hŏng dŭm anôk bruă hluê ngă hdră bhiăn Singapore dưi krơ̆ng kjăp lehanăn mđĭ kyar.

Phŭn bruă kahan ksiêm Việt Nam lehanăn dŭm anôk bruă djŏ tuôm mơ̆ng Singapore ƀrư̆ ƀrư̆ pŏk mlar hdră bi hgŭm, bi trông klei hâo hưn plah wah anôk bruă djŏ tuôm mnơ̆g dua tĭng čiăng bi trông kơ klei čiăng bi hgŭm hlăm bruă răng mgang klei êđăp ênang êlan mạng lehanăn bi kdơ̆ng hŏng phung ngă soh êlan mạng. Kơ kdrêč pô, Josephine Teo mñă Singapore srăng mtrŭt mđĭ, bi trông, bi mjĕ hŏng dŭm ala čar p’prŏng, mâo klei thâo lehanăn jăk găl hlăm bruă kdrăp mrâo msĕ si Mi, Nhật, Hàn Quốc čiăng kơ dŭm ala čar anăn sa ai, đru kơ anôk bruă djŏ tuôm hlăm hdră răng mgang êlan mạng hlăm ASEAN dưi bi mjĕ lehanăn ba yua hlăm hdră răng mgang klei êđăp ênang êlan mạng./.

Pô mblang: H’Nêč Êñuôl