VOV4.Êđê - K’iăng khua knŭk kna Lê Văn Thành gĭt gai klei bi kƀĭn online ruh mgaih klei dleh dlan, kpăk êgun kơ dŭm knơ̆ng bruă hlăm dŭm anôk bruă tuh tia, anôk mkra mjing, anôk ngă bruă hŏng kdrăp mrâo mrang lehanăn êpul anôk bruă tuh tia, mkŏ mjing hruê mbruê ti Hà Nội. Tui si phŭn bruă Hdră êlan lehanăn duh bi liê, klei ruă tưp Covid-19 dôk dleh dưi ksiêm dlăng, sui hruê, ngă leh klei hmăi kjham kơ dŭm knơ̆ng bruă, mnuih ƀuôn sang. Lu knơ̆ng bruă mdei leh klei ngă bruă, kyua amâo mâo mnơ̆ng dhơ̆ng, mnuih mă bruă, klei mă bruă. Lu knơ̆ng bruă lui leh lu klei kuôl kă mnia mblei, mâo nư dleh dưi tla, hmăi kjham truh kơ dŭm êklăk čô mă bruă hlăm bruă hlăm dŭm anôk bruă tuh tia, anôk mkra mjing…Čiăng ruh mgaih dŭm klei dleh dlan, krŭ wĭt bruă mkra mjing kơ dŭm knơ̆ng bruă, akâo kơ knŭk kna ksiêm dlăng čiăng mâo dŭm hdră êlan, bruă ngă klei mkra mjing djŏ čiăng kơ dŭm knơ̆ng bruă čŏng mâo dŭm hdră êlan duh mkra, mnia mblei djŏ hŏng klei găl grăp knơ̆ng bruă. mbĭt anăn, mtă kơ dŭm čar, ƀuôn prŏng amâo duah mdưm dŭm hdră êlan gang mkhư̆ klei ruă tưp, ngă dleh dlan kơ dŭm knơ̆ng bruă dŭ mdiăng mnơ̆ng dhơ̆ng lehanăn mnuih mă bruă lŏ wĭt mă bruă knuă.

Y Ƀel pô mblang