VOV4.Êđê- Hruê 17-9, K’iăng Khua knŭk kna Vũ Đức Đam leh anăn phung khua dŭm Phŭn, dhar bruă gưl dlông nao mă bruă gĭt gai bruă gang mkhư̆ klei ruă Covid-19 ti čar Tiền Giang. Blŭ hrăm hlăm mmông mă bruă, K’iăng Khua knŭk kna Vũ Đức Đam čih yap klei gĭr mơ̆ng dŭm gưl, dhar bruă, alŭ wăl ti čar Tiền Giang hlăm hdră gang mkhư̆ klei ruă Covid-19 ti alŭ wăl hlăm wưng êgao; boh nik bruă pŏk ngă hdră đru kơ klei hdĭp mda ala ƀuôn, mbĭt anăn mđing hmư̆ klei alŭ wăl akâo. K’iăng khua knŭk kna Vũ Đức Đam lač leh klei êdu kƀah hlăm hdră gang mkhư̆ klei ruă tưp čar Tiên Giang brei mđing hlue ngă hlăm wưng kơ anăp čiăng hnưm mkhư̆ klei ruă tưp. Hŏng dŭm alŭ wăl lăm lui asăp kwang dar brei lŏ dơ̆ng kriê dlăng kjăp alŭ wăl, lŏ dơ̆ng ktuê dlăng boh klei ruă tưp čiăng lŏ wĭt klei hdĭp msĕ aguah tlam.

Pô mblang: H’Zawut Ƀuôn Yă