VOV4.Êđê- Aguah mbrue (18/10) ti Hà Nội, k’iăng khua knŭk kna Vũ Đức Đam, k’iăng khua Êpul bruă ala čar mdrơ̆ng hŏng klei ruă tưp Covid 19 ngă leh bruă hŏng Phŭn bruă kreh knhâo kơ hdră êlan lehanăn bruă kreh knhâo pioh kơ bruă mdrơ̆ng hŏng klei ruă tưp. Ti anôk bi kƀĭn, phung bi ala bi mni kơ klei đru yuôm bhăn mơ̆ng bruă kreh knhâo hlăm bruă mdrơ̆ng hŏng klei ruă tưp. Wưng kơ anăp lŏ dơ̆ng ksiêm duah bruă mkra mjing vaccine, lehanăn êa drao mdrao mgŭn, dŭm hdră mkă dlăng kman mrâo, ksiêm duah bruă mkra kit mkă hnơ̆ng, lehanăn jih jang bruă ksiêm duah čiăng bi hrŏ klei hmăi amâo mâo jăk kơ klei duh mkra, lehanăn mkŏ mjing dŭm hdră bi hmô kơ bruă mjuăt bi hriăm, bruă mdrao mgŭn hlăm wưng kơ anăp. Phung bi ala bi lač, čiăng bi mâo hdră êlan kơ klei ksiêm duah kdrăp mdrơ̆ng hŏng klei ruă tưp, lehanăn ba yua kdrăp mrâo mrang, klei bhiăn iêo jak klei ksiêm duah, klei duh bi liê kơ klei ksiêm duah, bi mâo klei bhiăn iêo mkrum ngăn prăk kơ bruă ksiêm duah kdrăp mdrơ̆ng hŏng klei ruă tưp./.

Pô mblang: Y-Khem Niê