VOV4.Êđê - Hrue mbrue (27/9), k’iăng khua knŭk kna Vũ Đức Đam mă leh bruă hŏng phung khua kiă kriê ƀuôn prŏng Hồ Chí Minh kơ bruă mdrơ̆ng hŏng klei ruă tưp covid 19, kčĕ kơ klei čih mkra asăp mtrŭn bi mlih djăp bruă ngă čiăng bi djŏ guôp, dưi gang mkhư̆ klei ruă tưp Covid 19 lehanăn lŏ krŭ wĭt bruă duh mkra mơ̆ng hrue 1/10 kơ anăp.

K’iăng khua knŭk kna mñă, ƀuôn prŏng Hồ Chí Minh bi kjăp hdră kiă kriê, ksiêm dlăng klei ruă tưp, bi mlih hŏng klei jăk, ƀrư̆ ƀrư̆ kơrŭ kjăp bruă duh mkra, pral lŏ bi wĭt klei hdĭp phung ƀuôn sang lŏ wĭt msĕ hŏng yăng đar. Ƀuôn prŏng năng lŏ ksiêm wĭt bruă gang mkhư̆ klei ruă tưp hlăm alŭ wăl, čiăng kơ leh gưl mkă dlăng kman hlăm tar ƀar tui si klei khua knŭk kna kčĕ, mơ̆ng anăn bi klă hnơ̆ng kjăp klei mkă dlăng kman, thâo kơ eneoh tưp lar ti dŭm krĭng ênưih mâo klei ruă hĭn. K’iăng khua knŭk kna lač, hlăm hdră lŏ wĭt pŏk ƀăng, ƀuôn prŏng bi tĭng mkă bruă bi kơrŭ wĭt tal êlâo bruă knuă mơ̆ng dŭm phung duh mkra, anôk mkra mjing prŏng, alŭ wăl tuh tia, dŭm bruă yuôm bhăn mkăn./.

Y Khem pô mblang