VOV4.Êđê- Hŏng anăn “Mđĭ hnơ̆ng tŭ bruă lŏ hma Việt Nam ñŭ kma hŏng tar rŏng lăn” hruê anei, 8/10 ti Hà Nội, Khua phŭn bruă Lŏ hma mđĭ kyar krĭng ƀuôn sang mkŏ mjing leh Klei bi kƀĭn online “Ƀĭng hgŭm mđĭ kyar bruă lŏ hma h’ĭt kjăp Việt Nam (PSAV)". Klei bi kƀĭn jing mmông čiăng kơ dŭm ƀĭng hgŭm “Knŭk kna – Êngao kơ knŭk kna” mơ̆ng anôk bruă lŏ hma ksiêm dlăng wĭt ktuê êlan 10 thŭn ngă bruă lehanăn đĭ kyar mơ̆ng “ “Ƀĭng hgŭm mđĭ kyar bruă lŏ hma h’ĭt kjăp Việt Nam”. Mơ̆ng anăn hưn mdah dŭm klei tŭ jing, boh tŭ dưn dưi mâo ăt msĕ mơh klei hriăm čiăng lŏ dơ̆ng mtrŭt mđĭ boh tŭ dưn hdră bi hgŭm Knŭk kna – Êngao knŭk kna hlăm hdră mđĭ kyar bruă lŏ hma, krĭng ngă lŏ hma h’ĭt kjăp. Anei ăt jing klei găl čiăng kơ dŭm anôk bruă mtrŭt mđĭ klei ƀuăn jak iêu hdră duh bi liê, mđĭ kyar anôk bruă lŏ hma Việt Nam h’ĭt kjăp, hgao klei dleh dlan, lông dlăng mơ̆ng klei rŭng răng bruă duh mkra – ala ƀuôn kyua klei ruă Covid 19 ngă./.

                                                    Pô mblang: H’Nêč Êñuôl