VOV4.Êđê -  Klei bi kƀĭn phung Khua phŭn bruă hŏng tač êngao – Duh mkra APEC tal 32 (AMN 32) mrâo mkŏ mjing hlăm 6h mmăt hruê 8/11 hluê mmông Việt Nam hŏng klei hgŭm mơ̆ng 21 ala čar hlăm APEC; Êpul hgŭm đru kčĕ bruă mnia mblei APEC (ABAC), Êpul hgŭm dŭm ala čar krĭng Ngŏ Dhŭng Asi (ASEAN), Êpul bi hgŭm bruă duh mkra krĭng Pacifik (PECC), Klei bi kƀĭn trông dŭm plao ksĭ krĭng Pacifik (PIF), Êpul bruă mnia mblei tar rŏng lăn (WTO) lehanăn Anôk kriê dlăng jar klei kuôl kă mơ̆ng Êpul hgŭm lu ala čar kơ bruă bi mlih yan adiê (UNFCCC). Hlăk klei ruă Covid 19 dôk đĭ lar, hmăi truh kơ djăp mta ra bruă hlăm tar rŏng lăn lehanăn ba dŭm klei truh jhat ka tuôm mâo truh kơ jih jang hdră duh mkra, thŭn anei, Klei bi kƀĭn AMM dưi mkŏ mjing hluê hdră online, hlăm 2 hruê, 08-09/11/2021. Klei bi kƀĭn mâo kah mbha jing 2 gưl mă bruă. Gưl mă bruă tal êlâo mkŏ mjing hlăm hruê 8/11 mđing bi trông kơ hdră mtrŭt mđĭ pral bruă lŏ krŭ wĭt hdră duh mkra hluê hŏng dŭm hdră mrâo hlăm bruă mnia mblei./.

H Nêč pô mblang